طريقة الدراسة الصحيحة
تحية طيبة الاخوة الكرام
اذا اكملت قراءة الموضوع للأخر فأنت بطل وآهل للدراسة الصحيحة!
نظراً للكثير من الاسئلة التي تتعلق بافضل خطة دراسية حتى يحصل الطالب على افضل نتيجة من خلال دراسته,
اكتب لكم هذا الموضوع عبارة عن نصائح وانا ارجو من الجميع التقيد بها لصالحكم ولتستفيدو وتجتازو الامتحان من اول مرة.
طبعاً في اشخاص كثير عم تنجح وكمان بالمقابل في ناس عم ترسب, والراسبين بيعرفو انفسهم انهم مادرسو منيح او درسو من مصادر غير موثوقة او اعتمدو على السماع بدون القراءة والتمرن على نماذج الامتحان والاسئلة رغم انو البعض بيحاول يقول انه درس كتير ولما نشوف نتيجته بتلاقي عنده ضعف بكل المواد او بيكون ابتدى دراسته من اسبوع وفكر الامتحان بسيط وممكن يخلص منه ببساطة بدون جهد وتعب, او ما اتبعو طريقة دراسة مناسبة ممكن بسبب ضيق الوقت او انشغالات الحياة وخلافه وضياعهم بين المواقع ومصادر الدراسة الغير موثوقة هاد سبب هام للرسوب.
التوضيح الاول
الاغلبية عندهم الافضل والاسهل انهم يحفظو كم سؤال من اليوتيوب او من شي مصدر غير موثوق ويروحو يقدمو وينجحو وهي الفئة للاسف هي اكتر فئة عم ترسب, طبعاً الحفظ بدون فهم قوانين المرور بيكون سلبي ومارح يفيد, لازم الطالب يقرا ويفهم قوانين المرور وبعدها يتدرب بنفسه وبأيده على الاسئلة ويختار الجواب الصح ويعيش جو الامتحانات ولا يعتمد على الحفظ بس.
التوضيح الثاني
كتير مواقع موجودة على شبكة الانترنت عم تدعي انها مصادر موثوقة وهاد شي غير صحيح والناس عم تضيع بهيك مواقع لانو اصحابها اصلاً لا هم عايشين بالسويد ولا بيعرفو اي شي عن قوانين المرور وقوانين السويد وفاتحينها مشان الاعلانات والمكسب المادي بالمرتبة الاولى بدون اي اكتراث للطالب ونجاحه وتعليمه بشكل صحيح وهي المواقع ابعدو عنها وانا مارح اذكر اسمائهم ولكن تقدرو بشطارتكم تميزو الموقع الصح من الموقع الغلط او تقدرو تستفسرو على مجموعتنا على الفيس بوك عن اي موقع ممكن تشوفوه وتعرفو اذا كان موقع ثقة او لا.
التوضيح الثالث
في كتير ناس بتلاقيها عم تدور على اسئلة بس لتحفظها وتنجح وهاد شي سلبي بأمتياز ومافي اي فائدة لشخص حفظ بدون فهم وركب سيارة بدون فهم قوانين المرور وكيف يتصرف بموقف معين وهاد شي عم نشوفه كل يوم للأسف وانا بنصح الناس الي عم تدور على هيك اسلوب دراسة انو يغيرو افكارهم حتى يستفيدو ويفهمو قوانين المرور مش بس يحفظو كم سؤال مشان النجاح .
التوضيح الرابع
كتير ناس منشوفهم عم يدورو على اسئلة قواعد اليمين لما يرسبو ومنستفسر منهم ليش بس قواعد اليمين بيقولو انا رسبت وعندي ضعف بقاعدة اليمين او قواعد المرور, الصراحة انا بستغرب كيف الشخص قدر يعرف انو ضعفه قاعدة يمين وكيف قدر يحدد نقــاط الضعف الي خلته يرسب اذا هو اصلاً ما قرا ولا شاف صورة نتيجته الي بتوضح وجود اكتر من بند والي هم :
1- اسئلة المركبات
2- اسئلة البيئة
3- اسئلة الامان
4- اسئلة قواعد المرور
5- اسئلة الصفات الشخصية
بيكون عنده ضعف بكل هدول وعم يدور على شي واحد بس يدرسه, يا اخي الطالب ادرس كل شي ولا تركز على شي واحد افهم نقاط ضعفك قبل ما توقع بالغلط مرة ثانية ولا ترد على اي شخص بيقلك ادرس قواعد وبتنجح لانو الناس ماسكين هي الكلمة ودايرين فيها بدون سبب وعن جهل.
بعض النصائح الهامة للنجاح
النصيحة الاولى
كتير ناس ما بتحب الدراسة وانا بعرف هاد الشي ولهيك بنصحكم تضغطو على نفسكم فترة معينة وتفهمو قوانين المرور وتدرسو بشكل جيد ولا تنسو انو هاد الوقت بيمر بسرعة وبتصير زكريات واذا مادرستو منيح رح تتعبو لهيك عليكم بمحبة الدراسة والقراءة والفهم وليس الحفظ ولا تسمعو كلام الناس السلبية عليكم بحالكم ودراستكم وبس.
النصيحة الثانية
تخصيص الوقت, تخصيص الوقت الكافي للدراسة هو اول سبب لفهم قوانين المرور والدراسة بشكل جيد وانا دائماً انصح الجميع بالدراسة بمعدل 2-3 ساعات يومياً متواصلين وبدون انقطاع عن الدراسة ولا يوم, وطبعاً مضاعفة الوقت للطلاب الي امتحاناتهم خلال اسبوعين من اليوم الاول لبداية دراستهم.
النصيحة الثالثة
الطلاب الي عم يدرسو وامتحاناتهم بعد شهر او شهرين او اكثر, اول اسبوع في دراستكم اقرأو كتاب قوانين المرور اولاً او اقرأو الكتاب الالكتروني في تيوري سكاي كاملاً حتى تستفيدو من الدروس والشروحات الموجودة عليه وبعده راجعو قسم شواخص المرور وشوفوها كلها شاخصة تنطح شاخصة حتى تفهمو كل شاخصة شو بتعني وموجود وصف اسفل كل شاخصة بشكل مختصر وكمان حتى تسهل عليكم الاسئلة وفهم القوانين بشكل جيد والكتاب الالكتروني فيه الخلاصة ومايفيد بدون اضافات جانبية لا تغني ولا حاجة لها.
النصيحة الرابعة
دراسة نماذج اسئلة التيوري في تيوري سكاي جميعها بدون ترك اي مجموعة ولازم نتيجة الطالب تكون بكل مجموعة 70 من 70 اي علامة تامة حتى يضمن انه فهم الاسئلة والاجابات وفهم قوانين المرور ونقاطها بشكل جيد وعند الانتهاء من جميع نماذج الاسئلة اعادة التدرب والتمرن عليها كاملة مرة تلو الاخرى << حلوة هي مرة تلو الاخرى 😀 , التدرب حتى اخر لحظة قبل دخولك للامتحان امر هام ومفيد.
النصيحة الخامسة
لا تستسلم وتذكر ان كل شي يحدث هو خير وافضل لك ولصالحك والقادم اجمل اعمل جهدك وخصص وقت كافي للدراسة وان شاء الله الامور تكون جيدة واذا احترت يا اخي الطالب في اي سؤال يخص السياقة والتيوري فقط اطرح سؤالك على مجموعة الفيس بوك ورح تلاقي اجابة كافية, طبعاً في ناس بتستحي تصور وتحط على المجموعات وهاد امر سلبي كمان.
النصيحة السادسة
اغلب الاخوة بيسألوني من اي مواقع ندرس وشو المواقع الموثوقة والخالية من الاخطاء؟
ببساطة عليكم بتيوري سكاي ولا يتم مقارنة تيوري سكاي في اي مواقع اخرى لان ما يحتويه تيوري سكاي لن تجده في اي موقع آخر..
طبقو كل شي قريتوه بالموضوع هاد بالحرف وان شاء الله تتيسر اموركم
- قراءة كل الدروس الموجودة في الكتاب الالكتروني
- مراجعة كافة شواخص المرور على تيوري سكاي
- التمرن على نماذج الاسئلة ويجب ان تكون نتيجتك في كل مجموعة 70 من 70 لا اقل من ذلك
- الدراسة يومياً وبشكل متواصل ساعتين او ثلاث ساعات ومضاعفة الوقت اذا كان امتحانك قريب
- عند الانتهاء من كافة النماذج يجب اعادتها مجدداً وعدم التوقف عن الدراسة حتى اخر لحظة قبل امتحانك
- تيوري سكاي كافي ووافي اذا درست بطريقة صحيحة ولا داعي لتشتيت نفسك في مصادر اخرى
بالنهاية انا بتمنالكم التوفيق وبتمنى للجميع النجاح والسعادة وارجو منكم اتباع هذه النصائح هي لصالحكم اولاً واخيراً
اخوكم فراس النشاوي